Grèv «sektè sendikal»la pa mache

Grèv «sektè sendikal» la te lanse pou vandredi 29 novanm 2001 an pa t rive pran nan peyi a. Apa nan Sen Mak aktivite yo te fè yon ti ralanti, nan lòt vil yo, tankou Pòtoprens: lekòl, biznis, enstitisyon leta, transpò piblik elatriye te fonksyonne kòm alòdinè. Men atout sa, reprezantan CTH la Marc Antoine Destin te sòt pou bay moun zannana pou tizann lè li te pouse odas li pou li rakonte: «Nou menm nou anonse pou tout moun ki te respekte modòd grèv la, tout antrepriz ki te fèmen e tout kote modòd grèv la te respekte ke apati 5 kè aprè midi, nou leve grèv la. E nan nivo sektè piblik la nou pa t kontakte diferan sendika chofè yo...»  Yon lòt fwa ankò pèp la montre klèman ke li pap kite sendika pwofitè vin pran woulib sou do l. E sa dezapwouve kèk sondaj malatchong seri radyo boujwa nan kapital la ki t ap fè pwomosyon pou grèv sa a nan fè kwè pi fò moun te apiye li. Men dan lareyalite, Marc Antoine Destin pa t bezwen leve grèv li a paske sa pa t mache!
 Bò kote pa li, René Civil (JPP), ki nan «operasyon boukliye popilè» te denonse grèv «sendikalis» yo e li te di ke: «Plan an se yon plan ki kont chanjman e sa, pou destabilize peyi a, destabilize Lavalas...», te lanse Civil ki pa vle wè si Lavalas te pran men l, e trete byen revandikasyon popilè yo, gen anpil lòt pwofitè ki pa ta ka vle ap pwofite.

Grèv chofè nan Malpas

Chofè ki fè trajè Ayiti/Sendomeng yo te obsève 2 jou grèv 5 ak 6 desanm pase a pou te denonse: abi otorite dominiken yo ap fè lè yo enpoze yon taks 5 dola us an plis a tout Ayisyen k ap janbe fwontyè a;  fason y ap bay yon seri fo viza nan konsila dominken Petyonvil la; e tou pou chofè yo pote api yo ak paran ayisyen ki te viktim nan masak militè Monte Christi a, piske akize asasen yo te gen pou parèt devan tribinal jounen mèkredi 5 desanm lan.

Tansyon nan Ti Gwav

2 jou apre lanmò jounalis Brignol Lindor, nan lannwit madi 4 desanm 2001 an ajan Simo ki te debake nan Ti Gwav te tire anpil katouch ak gaz lakrimonjèn. Yon granmoun 76 zan, madan Lucane Dorléans mouri toufe. Ata ti moun piti te sibi konsekans britalite polisye yo. Polisye Simo yo te fòse divès moun nan vil la rantre lakay yo anvan lannwit fin tonbe. Divès sitwayen te kritike zak sa yo. Bò kote pa l, sibtiti komisè gouvènman an mèt Dumersier Bellande te fè konnen ke lajistis pral mete «aksyon piblik an mouvman kont koupab asasina jounalis la». Bó pa li, chèf OPL/Konvèjans lan, Gérard Pierre-Charles te deklare ipokritman: «Yon jounalis, yon militan kòz demokratik la, yon sitwayen an plis rejim Lavalas la asasinen...»

Rony Mondestin ap bay pa li 

Lidè youn nan branch Mouvman rekonstriksyon nasyonal (MRN) lan, Rony Mondestin te pran pozisyon nan fason pa l sou sa k ap pase nan Ti Gwav aktyèlman. E tou li te fè yon bann revelasyon otou lanmò jounalis Brignol Lindor la: «Samdi apre midi a 4trè 30, gen yon reyinyon ki fèt nan otèl Holiday Inn sou Chanmas la. Nan reyinyon sa a ki te dirije pa René Civil, te gen ant 12 e 15 sitwayen ayisyen. E te gen ofisyèl nan reyinyon an. M ap ba w plak machin ofisyèl ki te la a, se 0789. Nou pap bay pou moman an non moun ki pwopriyetè oubyen bay sèvis ak machin sa a. Reyinyon sa a al reprann Ti Gwav e li fèt nan presbitè a, donk se te yon reyinyon ki te planifye e ekzekite modòd tolerans zewo ke eli lokal lavalas yo ap aplike sou zòd chèf yo...», te eksplike Mondestin ki sanble li konplis tou, lefèt li te okouran de yon move plan konsa e ke l pa t avèti otorite lapolis, lajistis yo oubyen te denonse sa pa vwa piblik.

Palmantè yo denonse ANMH ak Konvèjans

Kèk palmantè Fanmi Lavalas tankou depite: Jean Candio, Yves Christallin, Sergo Métellus kritike, nan yon konferans pou laprès, Konvèjans demokratik la e patwon laprès yo atravè ANMH (Asosiyasyon nasyonal medya ayisyen), ki sanse bay manti. Palmantè yo akize ANMH kòm òganizasyon ki pran lajan nan men «kominote entènasyonal» la pou mete konfizyon nan peyi a, e yo toujou ap lage yon seri gwo dosye lou sou do manm Fanmi Lavalas yo. Depite yo te pran ekzanp asasina jounalis la nan Ti Gwav, kote yo te di se manm Konvèjans lan e direktè medya yo ki te lage gwo dosye sa a sou do manm Fanmi Lavalas.

Kidnapè yo renmèt bebe a

Kidnapè ki te vòlè ti fi 2 zan 7 mwa, Sarafina Guillaume lakay granpè li, nan Pòdpè 29 novanm pase a, te vin depoze li tou dousman devan yon komisarya nan Pòtoprens nan apre midi 3 desanm lan. Bandi yo ke FBI te gentan dèyè yo te mande oparavan 500 mil dola US pou te renmèt ti moun lan. 
 

Nouvèl kout nan Sidès

Jakmèl: Lise Penchina fete 141 ane li

6 desanm 1860 - 6 desanm 2001 sa fè ekzateman 141 ane depi Lise Penchina, youn nan pi ansyen etablisman sekondè nan Sidès la ap desèvi popilasyon an. Lise Penchina se youn nan pi gran etablisman leta nan vil Jakmèl ki fòme plizyè kad entèlektyèl selon kèk ansyen pwofesè Lise tankou eksdwayen tribinal sivil Jakmèl la Nobert Cormier. Pou te make dat sa liseyen yo te òganize divès aktivite spòtif tankou match foutbòl.  Nan okazyon an tou yo te chante yon mès aksyon de gras nan katedral Sen Jak ak Filip, se te yon okazyon tou pou elèv Lise a te denonse movèz fonksyonman Lise a, tankou pwoblèm dlo, ban, laboratwa ki pa ekziste nan Lise Penchina. Kanta pou nouvo direktè Lise a Claudy Simplice, li fè konnen li fè anpil efò pou pèmèt sitiyasyon an amelyore paske li menm li te jwenn kès enstitisyon an prèske vid. Sou revandikasyon elèv yo ap poze yo, direktè Simplice di Ministè Edikasyon Nasyonal la gen wòl pa li pou li jwe tou. Pandan Lise Penchina ap fete 141 rekòt kafe li, anpil moun nan popilasyon an pwofite okazyon an pou kritike enstitisyon yo yo di kifè Lise a ap fonksyone tankou yon gagè politik, kote jouk jounen jodia si yon timoun bezwen antre nan Lise a fòk li gen marenn oubyen parenn.

Monseyè Poulard kenbe fèm ak kominote entènasyonal la

Nan yon deklarasyon li fè nan laprès nan maten lendi 10 desanm 2001 an, visprezidan episkopal Legliz Katolik peyi Dayiti, Monseyè Guy Poulard di li pa kwè nan 17tyèm misyon OAE ki vinn fè traktasyon politik nan peyi a. Monseyè Poulard di li remake monte desann misyon OEA a fèt souvan alòske sa pa janm abouti a anyen. Monseyè a ajoute li pa kwè Cesar Graviria ap janm ka rive fè Konvèjans ak Lavalas jwenn yon antant tout bon vre. Sou kesyon kominote entènasyonal la Poulard di li pa konnen pou demen si kominote entènasyonal la va lache men, pou kounye a li wè yo kenbe fèm.

Brezilyèn: Popilasyon an ap mande pou moun li te eli yo
Brezilyèn se premyè seksyon kominal Benè, se yon zòn moun yo viv de travay latè, lapèch, lanmè. Selon plizyè abitan, zòn nan nan tan anvan yo te konn bay anpil manje e lapèch la te konn mache trè byen, jounen jodi a se lekontrè, lamè a pa bay e tè a pa vle pwodui ankò. Moun yo fè konnen ane sa a bagay yo pi di, non sèlman lapli pa tonbe, ti pye mayi yo te plante yo, solèy deja kokobe yo, alòske dejou anjou yo remake lavi a ap vinn pi difisil. Moun nan Brezilyèn di prezidan an, senatè, depite ak majistra elatriye yo vote a, yo pa janm wè youn desann nan zòn nan vinn fè yon koudèy pou wè kouman sa ye. Moun yo fè konnen pou jan yo wè sitiyasyon sa ap devlope nan Brezilyèn, pita ka pi tris. Nap raple te gen yon epòk secherès ki te tonbe nan zòn te oblije se te bò lanmè moun Brezilyèn ta l fouye ti twou dlo pou yo te ka bwè.

Jakmèl: Montaj rapido yon komite kanaval 
Nan moman nap pale la, komite kanaval pou jere kanal 2002 a deja monte ak Luc François, Prezidan, Fanfan Gaspard, VisPrezidan, Erick Nicolas, trezorye ak Gladys Figaro, sekretè. Se Majistra Jakmèl la Hugues Paul ki pran desizyon monte komite sa a. Fòk nou di komite a monte san konsantman gwoup madigra yo ak tout responsab band apye yo, pou komite sa a te monte menm laprès pat jwenn envitasyon. 
.