Nan peyi Dayiti
Nouvèl Kout Kreyòl
Lapolis ap ranmase zam
Nan zòn Kafou Marasa ki chita nan antre Kwadèboukè,
depi kèk jou lapolis, pa vwa pòt pawòl li Jean Dady
Siméon, anonse l ap mennen yon operasyon ranmase zam ilegal. Konsa
yo ta dekouvri nan yon kachèt zam, yon M50 ak yon kantite lòt
zam. 4 moun ta jwenn arestasyon yo selon Siméon toujou ki ta fè
konprann ke zafè zam sa yo gen rapò ak evènman 28
jiyè yo, jou yo te atake divès lokal lapolis nan peyi a.
Kongrè Tèt kole ti peyizan
«Bite pa tonbe» se tèm 2zyèm kongrè
nasyonal Tèt kole ti peyizan ayisyen ki te tanmen pandan 3 jou (15,
16, 17 out) nan Tòlann (Kafou) ane sa a. Nan sikonstans sa a, plizyè
delegasyon peyizan te sòti divès kote nan peyi a pou te vin
rann omaj a moun ki te tonbe nan lit pou chanje lavi a. Yon peyizan te
di: «Nan non tout moun ki tonbe nan lit la, nan non pè Ti
Jean Pierre-Louis, nan non pè Jean-Marie Vincent, nan non Jean Léopold
Dominique ki tonbe nan batay pou chanje sosyste sa a, Tèt kole ti
peyizan ayisyen di nou bite, nou pa tonbe.» Selon manm òganizasyon
peyizan sa a, kongrè a se pou yon reòganizasyon pou relanse
mobilizasyon an, pou yon veritab altènativ popilè.
Okap: Inogirasyon yon sikisal BRH
Se nan jounen 14 out 2001
an, an prezans divès pèsonalite ke inogirasyon premye sikisal
Bank repiblik Dayiti (BRH) la te fèt nan Okap. Pami moun ki te prezan
yo te gen minis Ekonomi ak Finans lan Gustave Flambert ki se tou prezidan
donè BRH e reprezantan chèf leta a nan seremoni an, prezidan
lachanm depite a Pierre Paul Cotin, minis Fanm lan doktè Ginette
Rivière Lubin, divès atis kou Emeline Michèl, Boulo
Valcourt e Eddy Prophète ki t ap evolye. Minis Finans lan te renmèt
papa defen Lesly François Delatour yon plak donè nan memwa
defen an pou travay li te reyalize nan bank santral la. N ap raple ke Lesly
Delatour ak Marc L. Bazin ki minis Planifikasyon aktyèlman nan gouvènman
Lavalas la, se te 2 gwo pilye k ap defann enterè FMI ak Bank mondyal
ki toujou ap prije peyi Dayiti.
Selebrasyon fèt Nòtredam
Nan maten 15 out 2001 an, plizyè pè ak lòt diyitè legliz katolik selebre fèt Nòtredam nan katedral Pòtoprens, an prezans divès pèsonalite tankou prezidan Jean-Bertrand Aristide ak madanm li Mildred Trouillot Aristide, kèk manm nan kabinè ministeryèl la, direktè jeneral lapolis la Jean Nesly Lucien avèk majistra Pòtoprens Marie Yves Pouponneau Duperval, elatriye.
*~