Nan peyi Dayiti
Nouvèl
Kout Kreyòl
Leta ayisyen an defisi
Pou premye 6 mwa lane fiskal 2000-2001 an, minis
Finans lan Gustave Faubert anonse ke leta ayisyen gen yon defisi yon milya
goud nan kès piblik la. Rezon ki fè sityasyon sa a, selon
minis lan, se ta 500 milyon goud ki te depanse pou eleksyon yo ak yon sibvansyon
leta ayisyen te bay pou te kenbe pri gaz la. Minis lan te di gouvènman
an pral kontinye ak politik fiskal la pou kontriyab yo ka peye lajan taks
ak enpo. Li te di tou li pral kontinye kontwole depans leta. Men minis
Gustave te bliye di tou zafè vòl nan leta a, gaspiyay lajan
pasi pala pou bonkou nan kalte defisi sa yo. E sa k pi rèd, yo pa
bay lè ke sa ap chanje, piske gen minis yo denonse kòm mimi
ki la pi rèd nan gouvènman ap fè e defè.
Minis lan kenbe pawòl li
Minis Lakilti ak kominkasyon gouvènman
Lavalas la, Guy Paul, di gouvènman an ap toujou kenbe pawòl
li te di sou tribin Oganizasyon leta ameriken (OEA) a, konsènan
konpwomi ki ta dwe jwenn pou yo sot nan kriz peyi a. Pwoposizyon sa ki
te fèt 14 mas pase a te konsène eleksyon lejislativ anvan
lè yo. Kidonk, palman an pral kraze nan 2 zan, pou refè lòt
eleksyon. Sa ki etonnan se ke minis Finans lan, Faubert Gustave te di se
òganizasyon eleksyon me ak novanm yo ki lakoz leta fè defisi
500 milyon goud, men kounye an gouvènman dakò pou fè
eleksyon nan mwens pase 2 zan. Kidonk, yo dakò pou leta fenk kare
fè defisi?
Chérestal ap vizite ministè
Premye minis ayisyen an, Jean-Marie Chérestal
koumanse vizite yon seri ministè nan peyi a, pou l ka gen enfòmasyon
li di sou fason y ap fonksyonne. Madi 17 avril la, Premye minis lan te
vizite Travo piblik transpò ak kominikasyon.
Chanjman nan diplomasi
Divès chanjman anonse nan diplomasi peyi
Dayiti, daprè enfòmasyon ki rive sòti. Kèk
nouvo ajan diplomatik, anbasadè, konsil pral revoke e ranplase.
Sa sipoze antre ann aplikasyon apre ke prezidan Aristide tounen soti nan
«somè Amerik» la.
Ed Japon a Ayiti
Minis zafè etranje ayisyen an, Joseph
Antonio, siyen yon akò koperasyon ak gouvènman japonè,
pou yon èd ki evalye a 2 milyon 6 san mil dola ke peyi Japon ap
bay Ayiti. Ed sa a ap sou fòm angrè pou agrikiltè
yo ann Ayiti.
Nouvo pati makouto-boujwa patripòch
Boujwa patripòch Olivier Nadal, makout
ak sipòtè makout Georges Satire e Harry Joseph fòme
yon nouvo pati politiko makouto-boujwa ki rele Mouvman pou inite nasyonal
(Moun). Twa reyaksyonnè sa yo ap viv Ozetazini nan pye travay yo.
Bush mande dyalòg
Madi 17 avril 2001 an, prezidan meriken an deklare
l ap tann OEA (Oganizasyon eta ameriken) jwe wòl abit nan dyalog
ant prezidan Aristide ak «opozisyon» an. George W. Bush ki
te al vizite sekretè jeneral OEA a nan lokal li Washington, anvan
l te al patisipe nan «somè Amerik» ki te gen pou fèt
Kebèk la, te di rankont sa a te pozitiv. Li te raple wòl
OEA dwe jwe nan lit kont koripsyon, kont trafik dwòg e move kondisyon
lavi moun.
Kanada vle ede Ayiti
Gouvènman kanadyen deside bay yon valè 126 milyon dola kanadyen pou ekzekite 28 pwojè nan diferan ti peyi, kote Ayiti sipoze benefisye pi gwo tranch lan, ki se yon valè 33 milyon dola. Lajan sa a k ap gen pou ale nan men yon ONG ki se Fondasyon Paul Gérin-Lajoie, ap gen pou sèvi pou «amelyore edikasyon nan lekòl yo ann Ayiti». Kanada prese vle debloke lajan sa a, dapre sa moun panse, se jis pou kraze fe kritik anti-mondyalizasyon yo, nan somè «Amerik» yo nan Kebèk. Vwala lalwa mondyalizasyon an, se bay ti «èd» pasi pala bay ONG, fasilite nouvo rich, apre vin mande gouvènman koutye pou pije pèp pou ranbouse dèt. Tout sa peyi sa yo bay ak men dwat yo retounen pran l an doub ak men goch.
*~